Сәтбаев қаласының жаңа әкімі Мұрат Бөрібаев жұмысқа кіріскен күннен бастап шаһардың тыныс-тіршілігімен кеңінен танысуда. Ол әуелі «сақалды құрылыстарда» болып олардың мән-жайын сараптады.
Шаһарда шаруасы жүрмей тұрған құрылыстардан бөлек, жаңғырту жұмыстары басталып, тоқырап тұрған нысандар да бар. Сондай қайта жөндеуден өтеді деген екі нысанның жұмысы былтырдан бері тоқтап тұр. Оның бірі қаланың батыс ауданындағы «Қызғалдақ» шағын-сәулеттік нысаны болса, екіншісі – «Тағзым» мемориалдық кешені.
Шаһар басшысы шаруасы шатқаяқтап тұрған осы нысандарға арнайы барып, оларды жаңғыртуға тиісті мердігерлермен кездесті.
Қаланың батыс ауданында тұрғындар серуендейтін, балалар ойнай алатын алаң жоқ. Сол олқылықтың орнын толтыру үшін осыдан бірер жыл бұрын жол жиегінде қылқиып жалғыз тұрған «Қызғалдақ» шағын архитектуралық кешенінің маңын абаттандырып, арнайы ойын алаңын, демалыс орнын жасау қолға алынған еді. Өкінішке орай әлде бір себептермен жұмыс тоқтап қалған. Қаланың жаңа әкімі осы жұмысты қайра жандандыруды қолға алды. Мұрат Ерболатұлы мердігерлерге бұл аумақты белгіленген мерзімнен бұрын қалыпқа келтіруді тапсырды. «Ұлытау Құрылыс» жауапкершілігі шектеулі серіктестігінің құрылысшылары шағын-сәулеттік нысанды қалыпқа келтіріп, жарықтандыру мен балалар ойын алаңын орнататын болды.
Сондай-ақ оқыңыз
«Тағзым» мемориалдық кешеніне де бірер жыл бұрын қайта жөндеу жұмыстары басталған болатын. Алайда, мердігер өзінің міндеттемелерін уақытылы орындамағандықтан қара тізімге енген. Биыл, «AlfuQurylys04» жауапкершілігі шектеулі серіктестігімен келісім шарт жасалды. Мердігер абаттандыру мен көгалдандыру және кешеннің қасбетін, алаңның тас төсеніштерін жаңарту бойынша жұмыстар атқарады.
Мұрат Бөрібаев сондай-ақ, қаланың төменгі бөлігінде орналасқан «Кенші даңқы» алаңына да барды. Мұнда былтыр «Қазақмыс» корпорациясымен облыс әкімдігі арасындағы меморандум аясында жөндеу жұмыстары басталған болатын. Жобаны іске асыру мақсатында «Кенші даңқы» скверін қайта жаңарту жұмыстары екі бөлікке бөлінді. «TansuConstruction» ЖШС 1600 шаршы метр жерге жаңа үлгідегі тас төсеніштерін төседі. Биылғы жылы 2,9567 шаршы метр жерді абаттандыру көзделген. Жобаға сәйкес алаңның кіреберісін реттеп, балалар ойын алаңын құру жұмыстары жоспарланған.
Ізтай БЕЛГІБАЙҰЛЫ.
