Жезқазған мыс қорыту зауытындағы «КәсіпҚорған» кәсіподағы комитеті металлургтердің мерекесінде кәсіпорындағы цехтарда жұмыс істейтін слесарь-жөндеушілер арасында кәсіби шеберлік байқауын ұйымдастырды.
Теориялық және практикалық кезеңдерде өткен байқауда қатысушылар өздерінің жинақтаған тәжірибелері мен білімін барынша көрсете білді. Кәсіподақ комитетінің төрағасы Ардақ Ақылбекованың айтуынша, байқауда бақ сынағандар өздерінің күнделікті атқарып жүрген шаруаларын сын сағатта да мүдірмей тиянақты етіп орындай білген.
– Кәсіби шеберлік байқауына 35 жұмысшы қатысты. Олардың әрқайсы берілген тапсырманы еңбекті қорғау талаптарына сай орындауға тырысты. Арнайы құрылған комиссия қатысушылардың білімі мен біліктілігіне баса мән берді. Жұмысты бастағаннан аяқталғанға дейінгі аралықтағы жүзеге асырылатын талаптардың ескерілуіне көңіл бөлінді. Екі аптаға жуық зауыттың цехтарында еңбек етіп жүрген слесарь-жөндеушілер біліктіліктерімен сыналды, – дейді Ардақ Мұқажанқызы.
Байқау қорытындысының нәтижесінде балқыту цехының намысын қорғаған Сағындық Құлмәжитов І орынды жеңіп алса, жылу, энергиямен қамту цехынан Александр Федотов ІІ орынды еншіледі. ІІІ орынның жүлдесі Айбек Сиязовқа бұйырды.
Сондай-ақ, балқыту цехынан Қайрат Алтаев, күкірт қышқылы цехынан Ардақ Жарас-
паев, шихта дайындау цехынан Алмас Есқалиев пен мысты электролиздеу цехынан
Самат Сатыбалдин арнайы номинациялармен марапатталды. Қалған қатысушылар кәсіподақ комитеті атынан ынталандыру сыйлықтарына ие болды.
Бағдат ҚАЗКЕНОВ.
