«Адам жанының арашасы» деп зор құрметпен аталатын мамандықты иеленген медицина қызметкерлерінің кәсіби мерекесі біздің өңірде де сән-салтанатымен өтті.
«Жезқазған медициналық орталығы» ЖШС әкімшілігі мен «КәсіпҚорған» кәсіподақ комитетінің ұйытқы болуымен мамандық иелеріне құрмет көрсетілді.
Мерекелік салтанатты жиында орталықтың директоры Владимир Моторыкин әріптестеріне адал да қалтқысыз қызметтері үшін алғысын білдірді. Аталмыш орталықтың ақ желеңділеріне Ұлытау облыстық денсаулық сақтау басқармасының басшысы Ләззат Ранова да ризашылығын жеткізді. Денсаулық сақтау саласына 43 жылын арнаған орталықтың Балқаш филиалындағы сарапшы дәрігер Рәбиғаш Жұмағұловаға «Денсаулық сақтау ісінің үздігі» төсбелгісі салтанатты жағдайда табысталды. «КәсіпҚорған» кәсіподағы Жезқазған филиалының төрағасы Ақылбек Төлепбергенов құттықтауын арнап, орталықтың бір топ дәрігерін марапаттады. Орталыққа қарасты Балқаш филиалындағы сала мамандарына да құрмет көрсетілді.
Бағдат ҚАЗКЕНОВ.
