Жол – қаладағы ең өзекті мәселе. Талай жылдан бері айтылып, жазылып келе жатыр. Биыл Жезқазғанда 57 көшенің жолы жаңармақ. Қалалық және облыстық қаражат есебінен автокөлік жолдарын жөндеуге Жезқазған қаласы бойынша 3,5 млрд теңге бөлінген.
Биыл облыс орталығында 40 шақырымға жуық жолға ағымдағы және орташа жөндеу жүргізіледі. Соның өзінде шаһардағы жүруге жарамды жолдардың көлемі 69% құрайтын болады. Қазіргі таңда Сәтбаев көшесінен Байқоңыров көшесіне дейінгі жолдарда ағымдағы жөндеу жұмыстары жүргізілуде.
Мердігер ұйым болып «Жезстрой-2023» ЖШС бекітілген. Дәл қазіргі уақытта 10 тонна асфальт жабындысы төселді.
Иә, көктем келе жезқазғандық жүргізушілердің де, жаяу жүргіншілердің де бейнеті артады. Олқылықты жою үшін қаражат қажет. Сондықтан жол құрылысы кезең-кезеңімен жүзеге аспақ. Қаладағы автокөлік жолының жалпы ұзындығы – 215 шақырым. Ал, жауаптылар жоғарыда айтып кеткен 57 көше жолын 10 маусымға дейін жөндеп аяқтаймыз деп отыр.
Гүлім МАРАТҚЫЗЫ.
