«КәсіпҚорған» кәсіподағы Жезқазған филиалы 8 Наурыз – Халықаралық әйелдер күніне орай Сәтбаев қаласында «Қазақмыс» корпорациясы» ЖШС құрылымдарында еңбек ететін қыз-келіншектер арасында көшпенділер ойынынан жарыс ұйымдастырды.
Жиырма команда қатысқан бұл бәсекеде 7 ойын түрі қамтылды. Ұлттық ойындарды насихаттап, нәзік жандардың спортқа деген бейімділігін арттыруды көздеген жарыс жолында үздіктер топ жарды. Қатысушы топтардың саны да көп болғандықтан жүлделі орындардың саны көбірек болды. Сонымен, көшпенділер ойынының І орынын «Сәтбаев қалалық жылумен, сумен жабдықтау кәсіпорны» ЖШС-нің намысын қорғаған «Күміс бұлақ» тобы жеңіп алды.
Топтағы қыз-келіншектер жарыстағы қиындықтар мен кедергілерден мүдірмей өтіп, жеңіске деген ынталарын танытты. ІІ орынды «Металлург» қонақүйінің «Алаш қыздары» тобы еншіледі. «Қазақмыс Мэйнтенанс Сервисиз» ЖШС-нің «Томирис» тобына ІІІ орынның жүлдесі бұйырды.
ІV орынды тау-кен жобалау инситутының «Наурыз гүлдері» тобы иеленді. V орын «Транко Жез» ЖШС-нің «Темір ханшайымдар» тобының үлесіне тиді. VІ орынды Жезқазған кен байыту фабрикасының «Болашақ» тобы місе тұтты. Өзге қатысушыларға ұйымдастырушылар атынан Алғыс хаттар мен сыйлықтар және көктемнің белгісі саналатын – раушан гүлі сыйға берілді.
Жалпы, кәсіподақтың алғаш рет ұйымдастырған бұл шарасы өндірістегі аруларымызды бір серпілтіп тастағаны сөзсіз.
Бағдат ҚАЗКЕНОВ.
