Жезқазғандағы саябақтар, скверлер мен аллеяларды күтіп ұстайтын арнайы мекеме құрылды. Ол – «Мәдениет және демалыс саябақтары басқармасы» деп аталады. Бұл жайында Ұлытау облысының әкімі Берік Әбдіғалиұлының төрағалығымен өткен кеңесте айтылды.
Аталмыш коммуналдық мемлекеттік мекеменің нақтылы штаты бекітілді. Бұл құзырлы мекеме, облыс орталығының көгалдандыру жұмыстарын күшейтуге ықпал етеді, дейді мамандар.
Алқалы жиында қала әкімі Қайрат Шайжанов Жезқазған қаласының даму бағдарламасын кеңірек таныстырды. Оның сөзіне қарағанда, «Қазақмыс» корпорациясымен меморандум шеңберінде қайта жаңартылып жатқан Металлургтер алаңы маусым айында қолданысқа беріледі. Ал, корпорацияның қолдауымен салынып жатқан «Намыс» спорт клубының балалар мен жасөспірімдер академиясы желтоқсанда қолдануға берілмек.
Шаһар басшысының баяндамасына қарағанда, мерекелі жылы мысты қалада 21 ойын алаңын, 18 спорт алаңын орнату да жоспарланып отыр. Сондай-ақ, 28 тұрғын үйдің қасбеті күрделі жөндеуден өтіп, ашық үлгідегі 10, жабық секциялы 19 аялдама орнатылады. 49 көшенің жолы орташа жөндеуден өтеді.
Қалада сол сияқты бірнеше тұрғын үйлер мен әлеуметтік һәм спорт нысандары салынып, пайдалануға беріледі деп күтілуде.
Ізтай БЕЛГІБАЙҰЛЫ.
