«Қазақмыс» корпорациясының өңірдегі жүк тасымалдауын ұйымдастырушы «Транко Жез» ЖШС әкімшілігі мен кәсіпорындағы «КәсіпҚорған» кәсіподағы комитеті бірлесіп теміржолшылар арасында футболдан шағын турнир ұйымдастырды.
«Транко Жез» және «НацСтройПроект» ЖШС еңбеккерлері қатысқан ала доп бәсекесі тартысты өтті. Екі кәсіпорынның командасы бір-біріне есе жібермеуге тырысты. Кәсіподақ комитетінің төрағасы Елдос Әбікенов бұл жарыс теміржолшылар арасында алғаш рет өтіп отырған жоқ дейді.
– Екі кәсіпорын жұмысшыларының спортқа деген ынтасын арттырып, белсенді өмір ұстанымын қалыптастыру мақсатын көздеген шағын турниріміз жыл сайын өтіп келеді. Осы турнирге қатысуға ниет білдірген командалар арасында «Жезқазғантүстімет» ӨБ деңгейінде ұйымдастырылған жарыстарға да қатысып, бақ сынағандар бар. Бұл турнир еңбек ұжымын салауатты өмір салтын ұстануға бағыттап қана қоймай, бірлікке де үндейді, – деді Елдос Қуанышұлы.
Турнир нәтижесінде бірінші орынның тұғырынан «Движения-2» командасы көрінсе, «Вагонник» командасы екінші орынмен марапатталды. «Движения» командасы үшінші орынға тұрақтады.
Бағдат ҚАЗКЕНОВ.
