Жылдағы дәстүрге сай «КәсіпҚорған» кәсіподағының Жезқазған филиалы Еңбек күніне орай жүздеген еңбеккердің басын қосып, түрлі дәрежедегі марапаттармен марапаттады.
«Жезқазғантүстімет» ӨБ ғимаратында өткен салтанатты жиынға қатысушылардың мерекелік көңіл-күйі ерекше болды. Кен өндіру, байыту, металлургия және қосалқы құрылымдарда еңбек еткен сол салалардың ардагерлеріне «КәсіпҚорған» кәсіподағының ұсынысымен «Еңбек ардагері» медалі, кәсіподақтың арнайы тағайындалған «Кәсіподақтың Құрметті қайраткері» және «Еңбек озаты» төсбелгілері табысталған жиын еңбек адамының мәртебесін асқақтатты.
Жиналған көпшілікті алғаш болып Ұлытау облысы еңбекпен қамту және әлеуметтік бағдарламалар басқармасының басшысы Нұржан Орынбаев құттықтап, облыстың қоғамдық-саяси өміріне белсене атсалысқан бірқатар азаматтарды Ұлытау облысының Құрмет грамотасымен марапаттады. «Жезқазғантүстімет» ӨБ бас директорының міндетін атқарушы Жасұлан Байниязов, «Қазақмыс» корпорациясы» ЖШС жанындағы Ардагерлер кеңесінің басқарма төрағасы Төлеген Бүкіров, Жезқазған мыс қорыту зауытының аппарат жетекшісі Силар Қияқбаев, «Лайықты еңбек» кәсіподағының төрағасы Қанатбек Мұрзатов, «Қазақмыс» корпорациясы» ЖШС «Jastar Bolashaq» Жастар одағының төрағасы Луиза Мыңбаева, «КәсіпҚорған» кәсіподағы Жезқазған филиалының төрағасы Ақылбек Төлепбергенов мерекемен құттықтап, сый-құрмет көрсетті. Ақылбек Сағиұлы кәсіподақ ұйымының бағдарламаларының жүзеге асуына қолдау білдірген аймақтағы өндіріс ошақтарының басшыларына жылы лебізін білдірді.
Бұл жиында газетіміздің тілшісі Бағдат Қазкенов ұйым тарапынан «Кәсіподақтың Құрметті қайраткері» төсбелгісіне ие болды. Аталған төсбелгі Бағдат Қазкеновтің кәсіподақпен тығыз жұмыс жасап, ақпараттандыруға қосқан үлесі үшін табысталды. Әріптесімізді марапатымен құттықтап, еңбегіне табыс тілейміз.
Кәсіподақ ұйытқы болған шарада «Үздік бригада», «Үздік ұжым», «Тәлімгер мен талапкердің сабақтастығы», «Үздік еңбек әулеті» сынды бірнеше номинация бойынша лайықтылар құрметтелді.
Бағдат ҚАЗКЕНОВ.
