«КәсіпҚорған» кәсіподағы Жезқазған филиалы мен «Қазақмыс» корпорациясы» ЖШС еңбеккерлерінің «Jastar Bolashaq» Жастар одағы «Қазақмыс» корпорациясының өңірдегі құрылымдары арасында жыл сайын жазғы, қысқы спорт түрлерінен спартакиада ұйымдастыруды дәстүрге айналдырды.
Желісі үзілмей келе жатқан спартакиадада қамтылған спорт түрлерінің ауқымы кең. Өткен жексенбіде футболдан өткен турнирдің жеңімпаздары анықталды. Кеніштер мен зауыт, фабрикадан, өзге де көмекші құрылымдардан жиырмадан аса команда қатысқан ала доп бәсекесінің ақтық сынына «Батыс», «ІТ» және Жезқазған байыту фабрикаларының командасы шығып, өзара бақ сынасты.
Ойын нәтижесінде Жезқазған байыту фабрикаларының командасы жеңімпаз атанды. Командаға ұйымдастырушылар атынан 200 мың теңге көлемінде сыйлық табысталды. Атап өтейік, бұл байытушылардың бірінші жеңісі емес. Бұған дейін де олар футбол ойынында топ жарған болатын. «Батыс» кеніші екінші орынды еншілесе, үшінші орынның жүлдесі «ІТ» командасына тиді.
Бағдат ҚАЗКЕНОВ.
