«Қазақмыс» корпорациясы» ЖШС жанындағы «Ардагерлер кеңесі» қоғамдық бірлестігінің Сәтбаев қалалық филиалы мүшелері құрылған күннен бастап игілікті шаралар өткізіп, зейнеткер кеншілердің үлкен қошеметіне бөленіп келеді. Басы ауырып, балтыры сыздаған бірде-бір ардагер кенші назардан тыс қалған емес. Олардың тұрмыс күйіне, салауатты демалуларына Ардагерлер кеңесі барынша жағдай жасап келеді.
Қаламыздың 50 жылдық торқалы тойы мен Кеншілер күніне орай Ардагерлер кеңесі кезекті спорттық ойындар ұйымдастырды.
Бұл спорттық жарыстар 16 тамызда еліміздің Спорт күнінен басталды. Алғашқы жарыс волейбол ойынынан өтті. Жезқазған-Сәтбаев қаласы ардагерлері арасында өткен тартысты ойынға «Қазақмыс» ардагерлерінен 16 адам қатысты. Жүлделі 1-орынға Жезқазған ардагерлері, 2-орынға Сәтбаев ардагерлері ие болды. Бұл күнгі екінші жарыс арқан тарту сайысы бойынша өтті.
Жарысқа «Қазақмыстан» 20 адам қатысты және 1-орынды ЖШПТ, 2-орынды Балқаштық, 3- орынды Сәтбаевтық ардагерлер иеленді. Келесі күні «Қазақстан» атындағы «ДЮСШ» шахмат клубында шахматшылар сайысы өтті, 14 ардагер қатысқан бұл жарыстың жеңімпазы: 1-орынға Әзірбек Молдағалиев, 2-орынға Александр Бабин және 3-орынға Мұхтар Молдағалиев ие болды. Үстел теннисі жарысы «ДЮШС» теннис алаңында болды, жарысқа 16 ардагер қатысып жүлделі 1-орын Мақсұт Шағырайға (Сәтбаев), 2-орын Рашат Ғабдрахмановқа (Сәтбаев) және 3-орын Нұрқазы Иманбаевқа (Балқаш)бұйырды.
Соңғы жарыс қол күресу сайысы бойынша Ш. Ділдебаев атындағы кеншілер сарайында өтті. Қызықпен өткен бұл сайыста 1-орынға А. Қапаров, 2-орынға К. Нұрыкеев, 3-орынға Е. Мұқашев және 4-орынға Д. Өмірзақов ие болды.
Өз кезегінде карташылардың қызықты ойыны «белка» да сырт қалмады. Жеңімпаздар арнайы дипломмен марапатталып, ақшалай сый-сияпатқа ие болды. Жүлделі орынға ие бола алмаған қатысушылар да сыйлықтан құр қалған жоқ, жарысқа белсене қатысқандары үшін оларға да арнайы ақшалай сый таратылды. Волейбол жарысында 2-орын және арқан тартудан 3-орын алған сәтбаевтық ардагерлер командасын «Қазақмыс» корпорациясы» ЖШС жанындағы «Ардагерлер кеңесі» басқарма төрағасы Т. Бүкіров дипломмен марапаттады. Осымен додалы жарыстар өз мәресіне жетіп, ардагер кеншілер асқан ризашылықтарын білдірді.
Жәми ТҰРСЫНБАЕВ,
«Қазақмыс» корпорацияы» ЖШС
жанындағы «Ардагерлер кеңесінің» мүшесі.
