Жезқазған қаласы әкімі Қайрат Шайжанов 8 Наурыз – Халықаралық әйелдер мерекесі қарсаңында қаламыздың дамуына үлес қосып жүрген қыз-келіншектермен мерекелік жиын өткізді.
«Дастарқан» мейрамханасында өткен мерекелік шараға қатысушылар арасында өңірдің дамуына үлес қосып жүрген ханымдардан бастап әнші мен мұғалім, кәсіпкерлер мен өндіріс, әлеуметтік салада қызмет етіп жүрген нәзік жандылар бар. Отырыста қала әкімі Қайрат Шайжанов әйелдер қауымына ыстық ілтипатын білдірді.
– 8 Наурыз – Халықаралық әйелдер күнімен баршаңызды шын жүректен құттықтаймын, – деді ол. – Сіздер отбасы-ошақ қасында болсын, еңбекте болсын, алдарыңызға қойған мақсат-мұраттарыңызға, парыздарыңызға үнемі адалдық танытып келе жатырсыздар. Сол арқылы адамзат тірлігінің түрленіп, көркеюіне өзіндік зор үлес қосудасыздар. Сіздердің де әрқашан құлпырып, жайнап жүрулереңізге шынайы тілектеспін.
Иә, ананың мейірімі мен махаббаты әлемді тербетіп тұр. Оларға мемлекет тарапынан көрсетілетін қамқорлық еселеніп арта бермек. Ал, аяулы арулар үйдің де, түздің де шаруасын қатар алып жүр. Бүгінгі әдемі кеште Жезқазған қаласының Құрметті азаматы Төлеген Бүкіров, қалалық ардагерлер кеңесінің төрағасы Мұрат Қазанбаев ұяңдық пен тектілікті бойына жиған қазақ қыздарына тән асыл қасиеттерді сақтап қалудың маңыздылығына тоқталды. Одан әрі қала әкімі ҚР Президентінің Жарлығы бойынша «Күміс алқа» төсбелгісімен марапатталған көпбалалы аналарға атаулы марапаттарды салтантты түрде табыстады.
Жиынға келген қыз-келіншектердің құшағы гүлге, көңілдері нұрға толды. Мерекелік шара шығармашылық ұжымдардың орындауындағы әдемі әндермен көмкеріліп отырды.
Гүлім МАРАТҚЫЗЫ.
