Он бір жыл өтіп барады, қояндардың қырылысып жатқанына. Бұлар да бірнеше жүзге, түрге бөлінеді екен. Сұр қояндар сұңқылдап жатыр: «Келер жылды өзіміз басқарамыз. Қанымыз таза. Жанымыз таза. Адамнан бұрын жаратылғанбыз…»
Ақ қояндар да қатты кетіп отыр: «Біздің жолымыз. Жан-жануарға біздей аңқылдаған адал, жайлы жыл болған емес…».
Мұндай саяси тартыстардан көпшілік біле қоймайтын алапес қояндар, қызыл көз қояндар, қайқы бас қояндар және тағы басқалары да шет қалған жоқ. Олар сұр қояндарды да, ақ қояндарды да жетпіс жеті атасынан боқтап, өздерін ұсынып жатты.
Бұл әңгіме үй қояндары – кроликтердің де мазасын алып бітті. Ағайындардан келіп-кетіп жатқан жансыздар «Кімді қолдайсыңдар, ашығын айтыңдар?» деп зірк-зірк етеді.
Зәресі ұшқан кроликтер адамдардан көргенін істеп, күнде төрт-бес рет жиналыс өткізеді. Қолдан келгенше бір-бірінің миын жейді. Әбден қажыды. Көздері алақандай болып жүдеп кетті. Құлақтары ұзарып жерге жетті. Биттері торғайдай болып, түнімен тыр-тыр қасынатын болды.
Бір күні осы қораның құты, махаббаттан басқаны білмейтін, айқай-шуға қатыса қоймайтын егде кролик сөз сұрады.
– Қожайыны бар жануарлар саясатпен айналыспауы керек,– деді ол. – Тірлікті өзгерту оңай емес. Даурығып жүргендердің қайсысы жеңсе, соны қолдай салармыз…
Айтпағымыз, кешеден бері қояндар әлемі үнсіз қалды. Жансыздардың сөзіне қарағанда, көпке беймәлім, Қара Қоян деген ноян келе жатыр екен елге. Өзі будан екен. Бойында бар қоянның қаны бар. Жолшыбай соққан ағайындары бірдеңе деген екен, «Қояншығым ұстамай тұрғанда, құйрықтарыңды қысыңдар», – депті. Депті де келесі жылы қанша алаяқ миллиардер болатынын, қанша жемқор ұсталатынын, қаншасы құтылып кететінін, қанша депутат пен министрдің орнынан ұшып кететінін және қанша тұралап біткен кәсіпорын мемлекетке қайтарылатынын сарт-сұрт айтып тастапты.
«Келер жылы сәбізден басқа тамақ жеуге болмайды. Менің штаб-пәтерім орналасатын жерде бір ел бар екен, билігінің мінезі ұзын құлақ сұр қояндарға ұқсайтын, соларға ғана ет жеуге рұқсат», – деп бірінші бұйрығын жазып тастапты.
Жансыздардың ақпаратына сүйенсек, тағы бірнеше бұйрықтың жобасы дайын екен. Соның бірі – «Кірмелер туралы. Аузына келгенін оттайтындар он жылға жер аударылады…»
Бір жерде сәбіз жеп отырып, «Соғысқұмарлар – өкінеді!»,– депті.
Қысқасы, Қара Қоян басқаны қайдам, қазақты жарылқайтын сияқты. Аман болайық!
Базарбай Әлеуханұлы.
