Қазақ балалар әдебиетінде тың туынды, мазмұн мен тәлім-тәрбиеге толы дүние жазып жүргендердің қатарында жерлесіміз, өндіріс озаты Ернұр Сейдахметтің туындылары өз оқырмандарының көңілінен шығып, оң бағасын алып келеді.
Республикалық, халықаралық әдеби байқаулардың жеңімпазы атанған Ернұрдың балаларға арналған «Қашан үлкен боламын?», «Тентке доп». «Күлші, кәне, балақай!» кітаптары өскелең ұрпақты еңбексүйгіштікке, адалдықққа, білімпаз болуға үндейді. Ернұр ізденімпаз әрі бала көңіліндегіні тап басып жазатын қабілетке ие ақын. Сол ізденімпаздығы мен қазіргі заман баласына қандай мазмұндағы шығармалар қажеттігін саралай келіп, жақында тағы бір туындысын жарыққа шығарды.
Алматы қаласындағы «Алматы-болашақ» АҚ баспасынан балаларға жол тартқан «Жалқау құмырсқа» кітабы төрт бөлімнен тұрады. Бірінші бөлімде ақынның балаларға арналған өлеңдер топтамасы енгізілсе, екінші бөлімде ертегілер, үшінші бөлімде жұмбақтар, ал, төртінші бөлімді аудармалар қамтыған.
Ернұр Сейдахметтің жаңа туындысы Қазақстан Республикасы Мәдениет және спорт министрлігі «Мәдениет және өнер саласындағы бәсекелестікті жоғарылату, қазақстандық мәдени мұраны сақтау, зерделеу мен насихаттау және архив ісінің іске асырылу тиімділігін арттыру» бағдарламасы «Әдебиеттің әлеуметтік маңызды түрлерін сатып алу, басып шығару және тарату» кіші бағдарламасы бойынша жарыққа шықты.
Бала тілін тапқан жаңа кітаптың авторы Ернұр Сейдахмет қазіргі таңда Жезқазған мыс қорыту зауытындағы күкірт қышқылы цехында механик болып еңбек етуде. Жұмыстан бос уақытта шығармашылыққа ден қоятын балалар ақыны алда талай тың туындысымен кішкентай оқырмандарын қуантпақ.
Бағдат ҚАЗКЕНОВ.
