Қазақстан машина жасаушыларының Х форумы қарсаңында Қарағанды құю-машина жасау зауытының Басқарма төрағасы Байғабелов Жәнібек Алтынбекұлы Индустрия және инфрақұрылымдық даму министрлігінің шешімі бойынша «Құрметті машина жасаушы» төсбелгісімен марапатталды.
Жәнібек Байғабелов Болашақ» бағдарламасы бойынша Ұлыбританиядағы Royal Holloway University of London университетінде «магистратураны бітірген. Өзінің кәсіби қызмет жолында еліміздің ірі кәсіпорындарында түрлі жұмыстар атқарған. Оқуды аяқтағаннан кейін «ENRС» корпорациясының өндірістік блогында 8 жыл еңбек етті.
2015 жылдан бастап темір рудасын өндірумен және өңдеумен айналысатын «Соколов-Сарыбай тау-кен байыту өндірістік бірлестігі» АҚ ауысып, 2016 жылы «ССКӨБ» АҚ техникалық қызмет көрсету және жөндеу жөніндегі Вице-президенті болып тағайындалды.
2019 жылы Қарағанды құю-машина жасау зауытының Басқарма төрағасы қызметін қолға алды. Қарағанды құю-машина жасау зауыты – тұрақты өсу қарқыны бар кәсіпорын. Жәнібек Алтынбекұлы зауыт басшылығына келген уақыттан бастап өндіріс көлемі артып, ҚҚМЗ-ты үздік нәтижелер көрсете бастады.
Үш жыл бұрын Қарағанды құю-машина жасау зауыты Қазақстан Республикасы Өнеркәсіптік Даму Қорының қолдауымен жаңғыртылды. Кәсіпорынды қайта жабдықтауға жалпы салым – 60 млн долларды құрады. Қазір ҚҚМЗ тек тау-кен өндіру үшін ғана емес, сонымен қатар мұнай-газ, энергетика секторлары, теміржол көлігі үшін де 12 мың атаудан тұратын өнім шығарады.
Әлеуметтік тұрғыда да үлкен өзгерістер болды. Соңғы екі жылда кәсіпорындағы орташа жалақы екі есе өсті және қазір 400 мың теңгені құрайды. Бұл – қазақстандық нарық үшін жоғары көрсеткіш.
Зауыттың осы жетістіктерінде білікті басшы, іскер ұйымдастырушы Жәнібек Байғабелвтің үлесі қомақты. Сондықтан оған берілген «Құрметті машина жасаушы» төсбелгісі мәртебесін асырған лайықты марапат болды.
Бағдат АЙТӨРЕҰЛЫ.
