Елімізде экономиканың негізгі күші саналатын көлік саласы қызметкерлерінің мерекесінде теміржол тарландарына да ерекше құрмет көрсетілді.
«Қазақмыс» корпорациясының жүк тасымалын ұйымдастырушы «Транко Жез» ЖШС-нде кәсіби мерекеде салтанатты жиын өтті. Кәсіпорын басшылығының құттықтауынан соң, «КәсіпҚорған» кәсіподағы комитетінің төрағасы Елдос Әбікенов бірқатар алдыңғы қатарлы теміржолшыларды құттықтап, Алғыс хат және ақшалай сыйлықтар табыстады.
Сонымен қатар «КәсіпҚорған» кәсіподағы Жезқазған филиалының аппарат жетекшісі Жанар Салықова теміржолшыларды айтулы мерекелерімен құттықтап, озаттарға бірінші, екінші, үшінші дәрежелі «Еңбек даңқы» төсбелгілерін тапсырды. Осылайша кәсіподақ теміржол тарландарының мерейін үстем етті.
Айта кетейік, мереке аясында кәсіподақтың ұйымдастыруымен кәсіпорын еңбеккерлері арасында «Әкем, анам және мен» спорттық шарасы өтіп, үздік командалар марапатталды.
Бағдат АЙТӨРЕҰЛЫ.
