Жаңа жоба жасалынды

Жезқазғанның батыс ауданындағы барлық әлеуметтік нысанның (Көпбейінді аурухана, қарттар үйі, мешіт, Абай атындағы мектеп-интернаты мен жатақханасы) жылу сапасын арттыруға арнайы жоба қолға алынды.

Аталған аумаққа Ұлытау облысы әкімінің тапсырмасына сәйкес газбен жұмыс істейтін қосымша қазандық салынуда. Ол жоба – нысандарда қызу температурасы әлсірегенде, ауыспалы кезең уақытында және оларды жазда ыстық сумен қамтамасыз ету мақсатында қолға алынды.

Өңір басшысы Берік Әбдіғалиұлы Абай атындағы мамандандырылған мектеп-интернатына арналған жатақхана құрылысы мен қатарындағы өзге де әлеуметтік нысандарды жылуға қосуда атқарылып жатқан шараларды бақылады.

– Жатақхана – қанша дегенмен, балалар тұрғылықты тұратын орын. Сол себепті жылу сапасына сенімді болуымыз қажет. Резерв ретінде салынып жатқан қазандықтың құрылысы жыл соңында аяқталғанын күтпей, орталықтандырылған жылу желісіне де қоса беруіміз қажет. Ол жұмыстарды жатақхана аумағын абаттандырудың алдында аяқтауды тапсырамын, – деді өңір басшысы.

Гүлім МАРАТҚЫЗЫ.