Ел аумағында көктем мезгілінен бастау алған «Таза Қазақстан» акциясы Ұлытау облысында да ауқымды көлемде жүргізілуде. Экологиялық ахуалды жақсартып, қоршаған ортаны зиянды қалдықтардан тазартуды көздеген акцияның шеңберінде «Қазақмыс» корпорациясы» ЖШС мен Сәтбаев қалалық әкімдігі «5 шиша тапсырып, 1 балмұздақ ал» шарасын өткізді.
Екі күн қатарынан ұйымдастырған экоакцияға Сәтбаев қаласынан 2 мыңнан аса бала қатысты. Акцияда 51 мың 500 шиша жиналған. Сенбі, жексенбі күндері өткен шарада балаларға 10 мың балмұздақ таратылды.
Табиғатты ластанудан сақтап, таза қала қалыптастыру идеясын насихаттаған экоакция қала тұрғындарына, соның ішінде жасөспірімдерге тазалықтың өзіміз өмір сүріп отырған ортаға қаншалықты маңызды екендігін ұғындырды. Ерекшелеп атап өтейік, шараның алғашқы күнінде 600, екінші күнінде 800 шиша тапсырған балалар рекордтық көрсеткішке ие болды.
Бағдат ҚАЗКЕНОВ.
