Жастарды қолдап, өз кәсіптерін ашып, бәсекеге қабілеттілігін арттыру мақсатында Жезқазған қаласының әкімдігі «Тәуелсіздік жастары» деген атпен арнайы байқау жариялаған болатын. Байқауға барлығы 40-қа жуық өтініш түсіп, комиссияның шешімімен 12 жоба іріктеліп, Жезқазған қаласы әкімінің грант иегерлері атанды.
Бұл жолы үміткерлер ғылым, мәдениет, ақпараттық технологиялар, кәсіпкерлік және медиа саласындағы жобаларын қорғады. Салтанатты жиында грант иегерлері арнайы көрме ұйымдастырып, өз жобаларын ұсынды.
– Жезқазған қаласының 70 жылдығы қарсаңында бүгін керемет іс-шараның куәсі болып отырмыз. Арнайы құрылған комиссия бірнеше күннен бері жобаларды саралап, сараптап, соның 12-сіне тоқтаған еді. Бүгін осы 12 жобаның иесіне қала әкімінің грантын салтанатты түрде табыстамақпыз. Ең басты үмітті сіздерге артамыз. Сіздер енді бүгін кішкентай жобаны тәй-тәй бастырып жатырсыздар, мұнымен тоқтамау керек. Алда мұнан да үлкен істер күтеміз, – деді қала әкімі Қайрат Шайжанов өз сөзінде.
Сонымен, Аслан Адамбаев, Аманкелді Әбілез, Құрмет Қожахметов, Ақниет Омарова, Алдияр Үкенов пен Индира Усембаева Жезқазған қаласы әкімінің грантына ие болып, 1 млн. теңгелік сертификатпен марапатталды. Сондай-ақ, лимонад өндірісімен Мадина Бухарбекова, лазер шеберханасымен Қайролла Хайдар және «Шырақ» ерекше қажеттілігі бар балаларға арналған реабилитация орталығы жобасымен Бекзат Рымбекқызына 1 млн. 500 мың теңгелік сертификаты табысталды.
Бекзат Рымбекқызы 31 жаста. Жезқазған қаласының тумасы. Орталықты ашуға қазіргі таңда психиатриялық бұзылуы бар балалар санының артуы, маман тапшылығы, орталықтарда бос орындардың болмауы себеп болды дейді. Орталық адаптивті дене шынықтыру, сенсорлы интеграция дефектология, нейропсихология бағыттары бойынша жұмыс жасап, 1,5 жастан 7 жасқа дейінгі балаларды қабылдайды. Қазіргі таңда 17 бала оңалтудан өтуде.
Салтанатты жиында сондай-ақ, 2 млн. теңгелік сертификатқа «Нуркидс» ана мен бала орталығының жетекшісі Шырынкүл Корбозова, Ұлттық нақыштағы заманауи бұйымдар өндірісінің негізін қалаушы Аяжан Шахаева және 11 қыркүйек күні ашылатын балет мектебінің жетекшісі Сая Садықова ие болды.
Гүлім МАРАТҚЫЗЫ.
